Soomaaliya ayaa ogolaatay in ciidamada Imaaraadku ka baxaan Muqdisho ka dib dhexdhexaadintii Itoobiya
MUQDISHO (Somalia) – Dowladda Federaalka ah ee Soomaaliya ayaa ogolaatay in Imaaraatka Carabta ay kala baxdo shaqaalaheeda iyo agabka ciidan ee ay uga harsan tahay magaalada Muqdisho iyadoo aan la baarin, kadib dhex dhexaadin ay sameysay Itoobiya.
Habayntaas, afar diyaaradood oo ay leedahay dawladda Itoobiya ayaa loo oggolaaday inay ka baxaan. Labo kamid ah diyaaradaha ayaa loo qorsheeyay in lagu daabulo shaqaalaha safaarada Imaaraatka Carabta iyo shaqaalaha ajaaniibta ah, halka inta hartayna loo qoondeeyay in ay qaadaan hub iyo agab ciidan.
Go’aankan ayaa ka dhigan in ay ka laabatay mowqif ay horay Muqdisho uga qaadatay. Arbacadii, dowladda federaalka ah ee Soomaaliya ayaa diiday codsi ah in diyaaradaha Itoobiya ay ku daabulaan qalab militari oo Imaaraatka Carabta ay wataan ka dib markii Abu Dhabi ay ku adkeystay in si toos ah looga bixi karo iyadoo aan baaritaan lagu sameyn.
Dhexdhexaadinta Itoobiya ka dib, maamulka Soomaaliya ayaa aqbalay shuruudihii Imaaraadka, waxaana loo fasaxay in diyaaraddu ay si toos ah uga shaqeyso Terminalka 23 ee garoonka caalamiga ah ee Muqdisho.
Duulimaadkii ugu horeeyay oo sidday qalab Milateri oo Imaaraatka Carabta ah ayaa gelinkii dambe ee Khamiistii ka ambabaxday magaalada Muqdisho, iyadoo la filayo in duulimaadkii labaad uu raaco saacado gudahood.
Ka bixitaanka heshiiskan ayaa ku soo beegmaya maalmo kadib markii dowladda federaalka Soomaaliya ay joojisay dhammaan heshiisyadii ay la gashay dowladda Imaaraadka Carabta, sida qandaraasyadii la xiriiray maamulka dekedaha Boosaaso, Berbera iyo Kismaayo, iyo sidoo kale hannaanka iskaashiga difaaca iyo amniga ee labada dowladood.
