KAMPALA () – Militariga Uganda ayaa shaaca ka qaaday inay qorsheynayaan inay ciidamadooda kala baxaan Soomaaliya, halkaasoo ay muddo 19-sano ah ku sugnaayeen ciidamada nabad ilaalinta Midowga Afrika ee AMISOM oo dagaal kula jira kooxda Islaamiga ah ee Al-shabaab, isla markaana taageeraya dowladda federaalka Soomaaliya.
Arrintan ayaa waxaa Isniintii ku dhawaaqay taliyaha ciidamada Uganda, Muhoozi Kainerugaba, oo sidoo kale ah wiil uu dhalay madaxweyne Yoweri Museveni. Wuxuu sheegay in ciidamada Uganda ay dhawaan ka bixi doonaan Soomaaliya, inkastoo aan laga bixin jadwal iyo faah faahin dheeri ah.
“Kadib 19 sano oo aan Soomaaliya joognay, waxaan dooneynaa in aan si buuxda uga baxno dalkaas dhawaan,” ayuu yiri X.
Uganda ayaa horay ugu hanjabtay inay ciidamadeeda kala bixi doonto. Madaxweyne Museveni ayaa horay uga digay in isqabqabsiga siyaasadeed ee joogtada ah ee ka dhex jira madaxda Soomaalida uu wiiqo dadaallada lagu doonayo in looga adkaado Al-Shabaab iyo dib u soo celinta xasilloonida dalka.
Hadaladii ugu dambeeyay ayaa kusoo aadaya xili dhaqaalo xumo xoogan ay soo wajahday howlgalka Midowga Afrika ee Soomaaliya oo hadda loo yaqaan AUSSOM (African African Support and Stabilization Mission). Ciidankan ayaa la daalaa dhacayay dhaqaale yari iyadoo ay jirto daalka deeq bixiyayaasha iyo diidmada Maraykanka ee ah in uu bixiyo taageero dhaqaale, taas oo keentay in hawl-galka uu dib u dhaco labadii sano ee la soo dhaafay.
Ciidamada Uganda ayaa tan iyo markii ciidamadan loo dirayay Muqdisho waxay door muhiim ah ka qaateen sugidda ammaanka Muqdisho iyo magaalooyinka kale ee waaweyn, taasoo ka dhigaysa bixitaan kasta oo horumar weyn u ah ammaanka Soomaaliya.
