Al-Shabaab ayaa sheegtay in weerar gaadmo ah ay ku qaadeen ciidamo isugu jira Mareykan iyo Soomaali oo ku sugnaa meel ku dhow magaalada Kismaayo
MUQDISHO Iska horimaad xooggan ayaa maanta oo Talaado ah ka dhacay meel ku dhow deegaanka Baarsanguuni ee duleedka magaalada Kismaayo, iyadoo ciidamada xoogga dalka oo kaashanaya kuwa maamul goboleedka Jubbaland ay dagaal ku qaadeen Al-Shabaab dhul beereed la isku haysto.
War qoraal ah oo ka soo baxay Wasaaradda Gaashaandhigga Soomaaliya ayaa lagu sheegay in Ciidamada sida gaarka ah u tababaran ee Danab ee uu tababaray Mareykanka ay howlgal ka fuliyeen deegaankaas oo ay wehliyaan Ciidamo ka tirsan kuwa Jubbaland, islamarkaana ay ku dileen 14 ka mid ah Maleeshiyaadkii weerarka soo qaaday, mid kalena ay dhaawaceen.
Al-Shabaab, si kastaba ha ahaatee, waxay soo bandhigtay xisaab aad uga duwan. Isagoo la hadlaayay Idaacada Andalus ee ku hadasha afka Ururkaasi, Abuu Muscab, ayaa wuxuu sheegay in Xoogaga Shabaab ay weerar gaadmo ah ku qaadeen Ciidamada Kumaandooska ee Danab oo ay wehlinayeen Ciidamo Mareykan ah, kuwaasi oo uu sheegay in howlgal ay ka fuliyeen meel ku dhow Baarsanguuni, isla markaana ay madaafiic ku garaaceen goobo ay ku sugnaayeen dad rayid ah. Waxa uu sheegay in dagaalyahanada Al-Shabaab ay dileen 32-askari oo ka tirsan ciidamada Danab oo ay ku jiraan 7 sarkaal, islamarkaana ay ka qabsadeen 5 gaari oo kuwa dagaalka ah oo ay ku jiraan kuwo qoryo ay saaran yihiin.
Kooxda ayaa sidoo kale soo bandhigtay sawirro ay ku sheegtay in ay muujinayaan baabuurta la qabtay oo qaarkood ay ku raran yihiin madaafiic iyo hub kale. Sawiro dheeraad ah ayaa kasoo muuqday Diyaarad Drone ah oo lasoo riday, taasi oo sahan ah, taasi oo Al-Shabaab ay sheegtay in ciidamada Soomaaliya ay u adeegsadeen howlgalka.
Ma jiro war madax banaan oo xaqiijinaya sheegashada tartanka. Meesha fog ee dagaalku ka dhacay ayaa adkaynaysa xaqiijinta.
Iska horimaadkan ayaa imaanaya iyadoo ciidamada Soomaaliya iyo saaxiibadooda caalamiga ah ay kordhiyeen howlgallada ka dhanka ah Al-shabaab ee ka socda Koonfurta Soomaaliya. Weeraradaas ayaa inta badan waxa ay ka kooban yihiin weerarro degdeg ah oo dib u gurasho ah, kuwaas oo intooda badan ay ku soo urureen jiidda hore ee Jubbaland.
