MUQDISHO () – Maamulka Somaliland ee ka go’ay Waqooyiga Somalia, ayaa maanta oo Axad ah taageero u muujiyay hawlgal ay ciidamada Maraykanku fuliyeen maalin ka hor, kaasoo lagu soo qabtay hogaamiyihii Venezuela Nicolas Maduro, kaas oo lagu wado in la horgeeyo maxkamad ku taal New York.
Qoraal ka soo baxay Wasaaradda Arrimaha Dibadda Somaliland, ayaa lagu sheegay in dawladdu ay taageerto tallaabooyinka Washington, iyada oo u qaabaysay inay qayb ka yihiin dedaallada caalamiga ah ee lagu soo celinayo dawladnimada dimuqraadiyadda iyo sharciga dalka Venezuela.
“Dawladda Jamhuuriyadda Somaliland waxa ay cadaynaysaa in ay mabda’a ahaan la safan tahay Maraykanka si ay u taageerto tallaabooyinka caalamiga ah ee lagu soo celinayo nidaamka dastuuriga ah, sharcinimada dimuqraadiga ah, iyo sharciga dalka Venezuela,” ayay wasaaraddu tidhi.
Waxa ay intaa ku dartay in Somaliland ay aaminsan tahay in wada shaqaynta uu Maraykanku hogaaminayo, haddii loo fuliyo si wada-jir ah oo lala yeesho saaxiibada gobolka iyo kuwa badan, ay wax ka qaban karto arrimaha bini’aadantinimada iyo ammaanka ee waddanka Latin America.
“Iyadoo la raacayo xeerarka caalamiga ah iyo tixgalinta amniga wadajirka ah, Somaliland waxay aaminsan tahay in ka-qaybgalka mas’uulka ah ee Maraykanku hogaaminayo, oo lagu fulinayo isuduwidda saaxiibada gobolka iyo kuwa badan, ay gacan ka geysan karto yareynta dhibaatada, ka hortagga shabakadaha dambiyada caalamiga ah, iyo taageeridda nabad, kala-guurka uu hoggaamiyo Venezuela ee ku salaysan madaxbannaanida, isla xisaabtanka, iyo ixtiraamka xuquuqda aadanaha.”
Hadalkani waxa uu u taagan yahay taageero aan caadi ahayn oo ay Somaliland ku taageerto isbedellada ka baxsan Geeska Afrika, taas oo muujinaysa sida ay ula safan tahay tallaabooyinka caalamiga ah ee Maraykanku hoggaaminayo.
